林沈默／跳舞時代──觀書法家蕭世瓊「舞力四射」作品冥想

聖人造字，

天落粟米，

紅雨瀉規暝，

萬路鬼吼啼啼。

毋願做人的武器、

毋願做人的迌物。

毋願做人的奴隸、

毋願隨在人畫烏擦白。

就在雷公爍爁的惡夜，

被倉頡仙師收伏，

綁跤束手、

忍氣吞聲，

關禁數千冬的漢字，

雄雄躘開枷鎖，

集體衝破烏牢，

鬧房、暴動，

翻身來解放。

怹對主家唱聲：

文字有頭有跤手，

愛有百面的自由。

文字有心有性地，

拒絕做人的傀儡。

文字有血有目屎，

命運由家己主宰。

文字追求尊嚴！

文字主張獨立！

阮欲出頭天…

阮欲出頭天…

墨是肉身、

烏是靈魂。

土地是大舞台，

宇宙是新世界。

怹無分男女，

大大細細，

赤跤露體。

怹歡頭喜面，

搖搖擺擺，

迎接跳舞時代。

怹搖動雙跤，

踢倒禮教。

怹舞動腰身，

壓倒體制。

怹～搖來搖去，

無禁無忌。

怹～舞東舞西，

自由自在。

阮欲出頭天…

阮欲出頭天…

阮欲出頭天…

阮欲出頭天…

●台音義注：迌物（tshit4-tho5-mih4），玩物。雷公爍爁（sih4-nah3），雷電交加。綁跤（kha）束手，手腳捆綁。唱（tshiang3）聲，放狠話。雄雄躘（liong3）開，猛然掙脫。百面，百分之百。怹（in）他們，暫借字。本詩首段乃演繹自倉頡造漢字，天降紅雨與粟米，鬼族夜號的傳說。