劉靜娟／無號名的金瓜

蹛（註1）隔壁巷的小妹三不五時會提菜和果子來予我。一方面是因為伊體貼姊妹的天性，一方面是因為妹婿愛買，大出手閣攏買固定彼幾項；所以小妹來拜託阮「鬥消」。毋是kan-na鬥食，是鬥消滅。我講恁新買的冰箱遐大台，囥（註2）咧慢慢仔食啦。伊講冰箱大台，愈放心買，一頓一頓攏彼幾項菜，敢會好食？煮的人看著就厭。

頂個月，伊提來的菜有一粒金瓜，講：「予你看媠。」隨共伊囥佇我十二屜骨董櫥頂頭。

我笑出來，栗子金瓜這陣足普遍，若細細粒，較稀罕的金柑仔色，猶淡薄仔有欣賞的價值；啊這粒有較大，色水也普通；烏青烏青，摻一寡柑仔色，有啥好看？

我初初學畫圖的時，捌買著細粒、真正金黃色的金瓜，彼款形體好畫，一稜一稜會當畫出光影的變化；若用粉彩來畫，閣較有成就感。

金瓜毋但好食，閣會當囥真久，袂歹去；學畫圖彼陣，我會共伊和兩三項果子囥佇一個青色的粗瓷仔盤，當作藝術品欣賞；有閒就共伊畫起來，過一站，才煮來食；免驚伊柯去抑是氣味較差。做囡仔的時，阮媽媽共金瓜連皮連子用薑炒過，才hip（註3）予軟。我也慣勢按呢料理。後來「進化」，才削皮切薄薄仔炒鹹鴨卵，抑是摻金針菇、cheese煮。

後來，無畫圖，買轉來的金瓜就凊彩囥佇塗跤一個淺籃仔內底，無菜的時才想著去煮來食。小妹提來彼粒栗子金瓜「坐」佇骨董櫥面頂，閣講予我看媠，身分煞無仝款；我無去振動伊，欲食金瓜就另外買較好削皮的匏仔形的。一遍一遍經過骨董櫥，真自然就共彼粒金瓜看一下。

看甲有感情，我講笑，「我毋敢共伊號名。」

韓國連續劇《我的出走日記》內底，女主角講欲飼來食的精牲，伊袂去共號名。神祕、逐家kan-na知影伊叫作「具先生」的男主角隨笑笑仔講：「你緊共我號名！」

共號名，伊的身分就無仝啊。

註：

1. 蹛（tuà）：住

2. 囥（khǹg）：放

3. hip：悶