劉靜娟／話uì鼻空出來

這是第二遍入去彼間店買大粒扁食（餛飩），包蝦仁的。

一個四十外歲的查某店員問我：「熟的抑是生的？」

我躊躇兩秒鐘，講：「生的。」

提著扁食的時，我問：「恁也有賣熟的？」

伊應；「有啊，無我拄才哪會問你熟的抑是生的？」

彼款口氣予我無歡喜。kan-na（只）講「有啊」敢毋是較好？較好禮、也較簡單。

頂遍來買包肉的扁食時，無人問我欲買熟的抑是生的，敢講包肉的一定是生的？我按呢問，是心內有淡薄仔憢疑，無疑悟得著這款予人無爽快的答覆。

以前阮媽媽批評講話無禮貌的人，會講：「伊的話uì（從）鼻空出來。」

這個查某人的話就是uì鼻空出來；做生理的人按呢敢著？我決定以後無愛閣來交關。（本來就嫌in的包裝有較過份，無環保觀念。）

閣較奇怪的是，塑膠盒仔掀開，發見15粒扁食齊齊倒匼（khap）佇格仔內！

頂遍買的一粒一粒摺花彼面向頂頭，親像一蕊一蕊花，看著嘛較好食款；這陣，in尻脊骿（背）向天，敢若予人欺負，覆佇塗跤。

哪會有人按呢囥（khǹg，放）扁食？是毋是彼位查某人也用尻脊骿來和人相見，無愛笑面看人？