劉靜娟／無人欲共你買

因為疫情，真久無去公園和幾位朋友做伙運動。

彼日，因為欲提拜託吳太太替我買的保養品，去in兜（tau，家）巷仔口見面。

老歲仔的保養品毋是美容的，是顧健康的。

兩人講的話也是關係健康的。舊年，阮兩人拄好（tú-hó，恰好）攏有「坐骨神經痛」，我痛正跤（右腿），伊痛倒跤（左腿）；阮後生講阮會當做伙去參加「兩人三跤」走標比賽。

這陣，伊的狀況無啥好；徛（khiā，站）袂直，peh樓梯、落樓梯也食力。

伊問我是按怎好起來的？我講應當是靠家己運動的。

阮兩人當咧痛的時，互相參考佗一位醫生較好，去佗位復健較有效？結果猶是照常痛。變甲無魍（báng），我去針灸，想袂到行去病院的時猶無大問題，針灸做了轉來厝的時，顛倒一路痛起來。不過，彼位中醫師講的話予我得著一个智識：跤腿上要緊，跤腿若有力，神經痛會有改善。

搝（giú，拉）筋會予跤腿有力；所以，我認真搝筋，逐工起床前做二十分鐘搝跤筋的動作。結果感覺跤腿較有力，神經痛也漸漸無發作矣。

吳太太講醫生叫伊做yoga，我講我起床後也會做yoga，基本的拜日式就有搝筋的效果。In查某囝是yoga老師，uì（從）美國用視訊教伊做一寡較好做的動作。「老歲仔骨頭硞硞（tīng-khok-khok，硬邦邦），無法度拗過來摺過去，kan-na會當儘量做較簡單的。阮查某囝閣叫in小弟也好好仔看伊做，會當示範予我看，也共我糾正。」

好喔，媽媽的神經痛是規家伙仔的代誌。毋過查某囝叫伊一日做三擺，一遍點外鐘，有較忝（thiám，累）。

「哎，有年歲，老矣。」

伊用這句話結束阮這早起的破豆（閒聊），「老矣」也是我和朋友三不五時會講的。這句話的意思，有時是認份，有時是無奈；不過，有時是詼（訕笑）家己抑是對方。

講著年歲，阮媽媽在生的時，一遍我轉去員林，和伊去對面的仔店開講；仔店頭家娘水生嫂呵咾阮媽媽皮膚好，無老人斑，也無啥皺痕。媽媽謙虛，講家己「有歲矣啦」。彼時陣伊已經七八十矣。

水生嫂滿面春風，講：「無人欲共你買！」

無人欲共你買？買啥？過兩秒鐘，我才想著「歲」和「貨」仝音。貨才有人欲買啊。